ប្រវត្តិនៃការបង្កើត និងផែនការយុទ្ធសាស្ត្រ

នៅក្នុងអណត្តិទី ២ នៃរាជរដ្ឋាភិបាលកម្ពុជាក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃរាជរដ្ឋាភិបាលកម្ពុជា ការវិនិយោគពិវិស័យ ឯកជនមានសន្ទុះគួរអោយកត់សម្គាល់ ក្នុងគោលបំណងអភិវឌ្ឍន៍ប្រទេសជាតិ និងចូលរួមកាត់បន្ថយភាពក្រីក្រ ក្នុងនោះក៏មានវិស័យ អប់រំផងដែរ។ នៅឆ្នាំ ២០០២ គ្រឹះស្ថានឧត្តមសិក្សាឯកជនមានការបង្កើតយ៉ាងច្រើន ក្នុងនោះសាកលវិទ្យាល័យ អន្តរជាតិ ក៏បានបង្កើតឡើងនាថ្ងៃទី ១៦ ខែធ្នូ ឆ្នាំ២០០២ តាមរយៈអនុក្រឹត្យលេខ ១២២ អនក្រ.បក ក្រោមគំនិតផ្តួចផ្តើមរបស់លោកបណ្ឌិត សាបូ អូហ្សាណូ និងបានចូលរួមរៀបចំផ្ទាល់ក្នុងការបង្កើតពីលោក អ៊ួន សាបូ និងលោកស្រី គួច សេងសាលី ដែលជាឪពុក ម្តាយបង្កើត មិត្តរួមជំនាន់ គឺលោកបណ្ឌិត សឿន សម្បត្តិ ដែលបច្ចុប្បន្នជាសាកលវិទ្យាធិការរង និងលោក សេង យ៉ាណា ជំនួយការ វាយកុំព្យូទ័រ។

ក្នុងដំណាក់កាលដំបូង យើងបានប្រើប្រាស់អគារចំនួន ៤ជាន់ នៅទីតាំងទួលគោក ជាកន្លែងរដ្ឋបាល និងសិក្សា។ យើងមានរចនាសម្ព័ន្ធអង្គភាព ដូចជា ឧត្តមទីប្រឹក្សា ដែលមានឯកឧត្តមបណ្ឌិត អ៊ុក រ៉ាប៊ុន, ឯកឧត្តម លី ប៉ូរ, ឯកឧត្តម កង កេង និងក្រុមប្រឹក្សាវិទ្យាសាស្ត្រ ដែលមានឯកឧត្តម សាស្ត្រចារ្យ វេជ្ជ. សំ សោភាន់, ឯកឧត្តមបណ្ឌិត អ៊ីវ ច័ន, ឯកឧត្តមបណ្ឌិត ហ៊ីង ថូរ៉ាក់ស៊ី, លោកបណ្ឌិត ហង់ សុវណ្ណ, លោកបណ្ឌិត កែវ ភក្តី និងមានសាកលវិទ្យាធិការរង ២រូប គឺបណ្ឌិត សឿន សម្បត្តិ និង បណ្ឌិត សាបូ អូហ្សាណូ។ រីឯសាកលវិទ្យាធិការ និងជាប្រធានក្រុមប្រឹក្សាភិបាល គឺ ឯកឧត្តម អ៊ួន សាបូ។

ដោយមានមនសិការអភិវឌ្ឃន៍ប្រទេសជាតិ ក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន ថ្នាក់ដឹកនាំសាកលវិទ្យាល័យ អន្តរជាតិ បានធ្វើពលីកម្មគ្មានគិតនឿយហត់ ដោយបានដាក់ចេញនូវផែនការយុទ្ធសាស្ត្រសំខាន់ៗ និងសំរេចបានជាបន្តបន្ទាប់ដូចជា៖ ការកសាងអគារសិក្សាថ្មី កំពស់ ៦ជាន់ លើផ្ទៃដី ៣០ម x ៨០ម នៅទីតាំងភ្នំពេញថ្មី អគារមន្ទីរពេទ្យសាកលវិទ្យាល័យ អន្តរជាតិ សែនសុខ មានកំពស់ ៧ជាន់ លើផ្ទៃដី ៦០ម x ៦០ម ដែលគ្រោងនឹងដាក់អោយដំណើរការនាខែ មេសា ឆ្នាំ ២០០៩ អគារអន្តេវេសិកដ្ឋានកំពស់ ៧ជាន់ មាន ១៨០បន្ទប់ សម្រាប់និស្សិតមកពីខេត្ត និងនិស្សិតបរទេស។

សរុបសេចក្តីមកសមិទ្ធិផលកកើតឡើងមាននេះគឺដោយសាររាជរដ្ឋាភិបាលកម្ពុជា ក្រោមការដឹកនាំចង្អុលបង្ហាញដ៏ត្រឹមត្រូវពី សមេ្តចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលបានខិតខំ និងសំរេចបាននូវ ស្ថេរភាពនយោបាយ សុខសន្តិភាពពេញលេញទូទាំងប្រទេស និងមានគោលនយោបានត្រឹមត្រូវ និងវែងឆ្ងាយជាពិសេស លើវិស័យអប់រំ។